Папхнулі, а ён і разваліўся…
23 студзеня 2008 года
На Савецкай вуліцы аўтамабіль крыху штурхнуў адзін з новых ліхтароў. Той, замест таго, каб крыху нахіліцца, упаў і разваліўся на часткі.
Неяк давялося ўбачыць карціну: выйшаўцы з “Карчмы” добра “паддаты” дзядзька вырашыў прадэманстраваць сваю моц, ухапіўся за адзін з навапастаўленых ліхтароў і... пачаў яго качаць. Ліхтар з рыпеннем вагаўся з боку ў бок, як маладая бярозка пад вясеннім ветрыкам. Міжволі ў галаву прыйшла думка: “А наколькі бяспечная для чалавека гэтая ненадзейная, складзеная з некалькіх частак пустацелая канструкцыя?”
Не ўмураваны ў зямлю, а прыкручаны чатырма балтамі, ліхтар з’яўляецца, па-сутнасці, вялікім канструктарам-складанкай і зусім нічога агульнага не мае з масіўнымі чыгуннымі ліхтарамі, што ставіліся на гарадскіх вуліцах у ХІХ-пач.ХХ ст.
Эстэтыка яго таксама здзіўляе. Чаму б не было, скажам, замовіць для гэтых ліхтароў таблічкі з выявамі герба Гродна, як у Львове ці Варшаве, і не прымацаваць іх да кожнага ліхтара на ўзроўні чалавечых вачэй? Не дадумаліся? Наўрад ці. Проста ідэя не ўпісвалася ў серыйную вытворчасць гэтай “прадукцыі”. Вынік: камічнае разбурэнне такога ліхтара ад лёгкага ўдару аўтамабіля, што задам ад’язджаў да вуліцы. Колькі гадоў прастаіць уся гэтая “прыгажосць”, можна толькі здагадвацца.
Чытайце таксама: 02.01.2008 Вялікія войны маленькіх людзей на вул. Савецкай 20.09.2007 Рэканструкцыя Савецкай вуліцы, падвядзенне вынікаў 03.08.2007 История уходит из–под ног? 11.07.2007 Развітанне з Магістратам – чарговы падман гарадзенцаў 18.02.2007 Дзесяць крокаў да аднаўленьня гарадзенскай староўкі (Бібліятэка)
|
