| Мінкультуры прыпыніла знішчэнне старажытнага будынку ў Гродне
Еўрапейскае радыё для Беларусі, 13 верасня 2006 года
Міністэрства культуры Беларусі накіравала ў Гродзенскі гарвыканкам ліст пра неабходнасць прыпынення працаў, якія могуць прывесці да знішчэння аднаго з будынкаў у старым цэнтры Гродна. Паводле дакумента за подпісам намесніка міністра Уладзіміра Градзюшка, пытанне аб наданні гэтаму дому статуса гісторыка-культурнай каштоўнасці бліжэйшым часам будзе вынесены на разгляд Беларускай навукова-метадычнай Рады па пытаннях гісторыка-культурнай спадчыны. Гэта азначае, што «мясцовы выканаўчы орган павінен прыняць захады ў справе перашкодаў прычыненню шкоды дадзенай пабудове».
Гісторык архітэктуры Ігар Трусаў распавёў, што дом на вуліцы Горкага, пра які ідзе гаворка ў лісце Міністэрства культуры, быў пабудаваны ў стылі канструктывізму ў 20-х гадах мінулага стагоддзя. Такіх будынкаў у Гродне засталося менш за дзесятак.
Гродзенскія гісторыкі спрабавалі выратаваць стары дом, але мясцовыя ўлады ўжо ініцыявалі пачатак разбурэння цэлага кварталу пад назвай «Залатая горка» для пабудовы там гасцінічна-спартовага комплексу. Вольга Чайчыц з рэспубліканскай гісторыка-краязнаўчай арганізацыі распавяла, што моладзь з Гродна і Мінску збірала подпісы гродзенцаў у абарону дома, а гісторыкі неаднаразова звярталіся па інстанцыях. Яны намагаліся спыніць знішчэнне гродзенскіх памятак даўніны пад выглядам «рэканструкцыі».
Гістарычны цэнтр Гродна з 1988 году знаходзіцца пад аховай дзяржавы. Паводле сведчанняў гісторыкаў, колькасць помнікаў архітэктуры ў гэтым горадзе перавышае колькасць архітэктурных помнікаў ва ўсіх іншых гарадах Беларусі.
У апошнія гады мясцовыя ўлады праводзяць рэканструкцыю цэнтра Гродна з грубейшымі парушэннямі дзейнага заканадаўства.
Еўрапейскае радыё для Беларусі паведамляла пра тое, як падчас рэканструкцыі старой плошчы ў Гродне замест правядзення археалагічных даследаванняў быў знішчаны культурны пласт зямлі на вялікай тэрыторыі, а глеба з плошчы вывозіцца хаатычна. У адвалах зямлі гісторыкі знаходзілі бясцэнныя знаходкі, якія сведчаць пра мінулае Гродна.
Цяпер, пасля абнародвання ліста Міністэрства культуры ў Гродзенскі гарвыканкам з’явілася надзея на тое, што бяздумнае знішчэнне помнікаў гісторыі і культуры ў Гродне будзе прыпыненае. У кастрычніку на паседжанні Беларускай навукова-метадычнай Рады па пытаннях гісторыка-культурнай спадчыны плануецца разгледзець пытанне пра рэканструкцыю гістарычнага цэнтру гораду. Але, паводле словаў гродзенскага гісторыка Андрэя Вашкевіча, радавацца рана, таму што на чарзе стаіць пытанне аб зносе старажытнага дому па вуліцы Калючынскай у старым цэнтры. Дзяржаўная газета «Гродзенская праўда» ўжо апублікавала ліст гараджаніна, які прапануе знесці гэты дом. Пад знос вызначаныя і іншыя дамы ў гістарычным цэнтры, і за іх гісторыкам яшчэ давядзецца весці барацьбу.
Цікава, што гарадскі туалет, які на працягу многіх гадоў месціўся ў Гродне насупраць Фарнага касцёла, так і не знеслі. Хаця ўлады абяцалі яго прыбраць адразу пасля рэканструкцыі Савецкай плошчы.
З Гродна Таццяна Смірніцкая,
Еўрапейскае радыё для Беларусі
http://www.belradio.fm/news.php?readmore=379
Чытайце таксама:
13.09.2006 В Гродно пока не будут сносить здание-памятник конструктивизма
09.09.2006 Закон на баку будынка! - паведамленне з Міністэрства культуры РБ
08.09.2006 НеСНОСный вопрос
01.09.2006 В Гродно снесен исторический квартал по улице Горького
31.08.2006 Хроніка разбурэння Залатой горкі
21.08.2006 Развязки в Гродно: пл. Советская, Автовокзал, Горького-Виленский
18.08.2006 Канец Залатой Горкі
10.08.2006 Дом-помнік зносяць, людзі ў халупах застаюцца
19.07.2006 Горадню выратуе сквапнасць
13.07.2006 Жители Гродно подали жалобы в горисполком и Администрацию президента
06.07.2006 Гродно: бульдозеры против истории
05.07.2006 Дом под снос. Вечерний Гродно, 5 июля 2006 года, №27
17.06.2006 Пачалі бурыць дамы...
13.06.2006 Сказ аб Лысай гары – канкрэтныя прапановы па рэканструкцыі вул. Горкага
26.05.2006 Апакаліпсіс працягваецца – зносяць цэлы гістарычны квартал ў “Новым Свеце”
15.11.2005 Другая Няміга або аб зносе дамоў на вуліцы Горкага
01.12.2005 Эпітафія дому або пра гарадзенскі канструктывізм
|
