У цэнтры Гродна знайшлі невядомыя пахаванні Еўрапейскае радыё для Беларусі, 21 верасня 2006 года Пахаванні з чалавечымі парэшткамі знойдзеныя ў Гродне падчас рэканструкцыі старога пажарнага дэпо. Як сцвярджаюць гродзенскія гісторыкі, у чарговы раз было парушана заканадаўства падчас правядзення земляных працаў у гістарычным цэнтры гораду. Яны праводзяцца з парушэннем культурнага пласту зямлі без абавязковага археалагічнага нагляду. Некалькі чарапоў і косці выкапаў коўш эскаватара з дзвюх ямаў на глыбіні каля 5 метраў на тэрыторыі каля гродзенскага Біг-Бэна. Так гродзенцы называюць старую пажарную каланчу, з якой бачны ўвесь горад. Каланча і дэпо былі пабудаваныя пасля пажару 1885 году. Але ўжо з XIV стагоддзя на гэтым месцы размяшчаўся пасад старой Гародні. Паводле меркавання гісторыкаў, культурны пласт дасягае тут глыбіні 6-7 метраў. Цяперашні будынак дэпо пабудаваны пасля 2-ой Сусветнай вайны. Гарадскія ўлады вырашылі зрабіць у ім музей пажарнай справы. Паводле праекту інстытута "Гроднаграмадзянпраект" да старога будынка каля пажарнай каланчы будзе надбудаваны другі паверх. Сёння ўнутры будынка выкапаныя 4 ямы глыбінёй каля 2 метраў. Будоўля ідзе тут ужо 2 тыдні, і кожны дзень рабочыя знаходзілі чарапкі глінянага посуду і кераміку XV-XVIII стагоддзяў. А калі былі выяўленыя чарапы і косці, гродзенскія гісторыкі, якія з самога пачатку прац па рэканструкцыі стала дзяжурылі на будоўлі, выклікалі на месца здарэння супрацоўнікаў міліцыі і пракуратуры. Быў складзены пратакол, а затым косці і 5 чарапоў, адзін з якіх, верагодна, дзіцячы, павезлі на экспертызу. Доктар гістарычных навук Алесь Краўцэвіч распавёў, што ў гэтым месцы старой Гародні ніколі не праводзіліся археалагічныя раскопкі. А супрацоўнік Інстытута гісторыі Акадэміі навук Беларусі, археолаг Аляксандр Мядзведзеў гаворыць, што, мяркуючы па глыбіні, на якой былі выяўленыя чалавечыя парэшткі, яны могуць адносіцца да пахаванняў у пасадзе ў падножжы гары каля Старога замка, які фармаваўся з 2-ой паловы XI стагоддзя. Па словах археолага, Ніжняя царква ў Старым замку - не адзіная на гэтай тэрыторыі. На месцы пажарнага дэпо таксама магла быць і царква, і могілкі, якія да XVI стагоддзя размяшчаліся побач з храмамі. Таму неабходна тэрмінова спыніць будоўлю і прыступіць да раскопак. Археолаг Мядзведзеў сцвярджае, што з Інстытутам гісторыі Акадэміі навук праект рэканструкцыі пажарнага дэпо не ўзгадняўся, і заяўка на археалагічныя працы не паступала. Супрацоўнік Гродзенскага гісторыка-археалагічнага музея Андрэй Вашкевіч лічыць, што за правядзенне земляных прац без археалагічнага нагляду і знішчэнне культурнага пласта павінны адказваць як распрацоўнікі праекту, так і мясцовыя службоўцы, адказныя за ахову гістарычных помнікаў у Гродне. Адпаведна гродзенскія гісторыкі рыхтуюць заяву ў пракуратуру аб парушэнні Закона аб гістарычнай спадчыне. Гэта не першы выпадак, калі на тэрыторыі старога горада, які знаходзіцца пад аховай дзяржавы, працы праводзяцца з парушэннем заканадаўства. Таму ў кастрычніку на пасяджэнні Беларускай навукова-метадычнай Рады па пытаннях гісторыка-культурнай спадчыны плануецца разгледзець пытанне аб праблемах рэканструкцыі гістарычнага цэнтра Гродна. Таццяна Смірніцкая, http://www.belradio.fm/news.php?readmore=406 Чытайце таксама: 22.09.2006 Земляныя работы ў пажарным дэпо спынены 17.09.2006 Вайну з гісторыяй пачалі пажарнікі - рэканструкцыя пажарнага дэпо з парушэннямі заканадаўства Дадаць каментарый Імя: Каментарый: шэсць чатыры сем адзін - увядзіце гэты код лічбамі (цифрами)

Галоўная | Аналітыка | Артыкулы ў прэсе | Фотахроніка | Галерэя | Слаўныя імёны | Бібліятэка | Гасцёўня | Апошнія каментарыі | Статыстыка наведванняў