Новы Свет
9 ліпеня 2008 года
Больш чым сто трыццаць гадоў прайшло з таго часу, калі на выкупленых у князёў Друцкіх-Любецкіх землях маёнтку Станіславова ўзнік раён горада, які атрымаў назву Новы Свет. Ціхія вулкі, маленькія, але вельмі прыгожыя драўляныя і цагляныя асабнячкі, непаўторны дух правінцыйнага, але ганарыстага сваім мінулым горада…
Сёння Новы Свет – гэта адзін з найбольш арыгінальных і захаваных раёнаў нашага горада, куды пакуль не дабраліся экскаватары нашых “рэканструктараў”. Гарадзенскі Новы Свет – гэта матэрыяльнае ўвасабленне нашай гістарычнай талерантнасці і цярпімасці, якой мы так ганарымся перад суседзямі. Таксама як сёння на вулках Новага Свету адзін каля аднаго стаяць будынкі, пабудаваныя пад уплывамі самых розных архітэктурных стыляў, так калісці жылі ў Новым Свеце людзі самых розных нацыянальнасцяў, якія нарадзліся ў нашым цудоўным горадзе або суровымі вятрамі гісторыі аказаліся закінутымі сюды.
Беларусы Янушкевічы, Федарукі і Багдановічы, палякі Цыпельты, Вайцяхоўскія і Астроўскія, рускія Маісеевы і Кірылавы, яўрэі Канэлі і Маламеды, татары Маслоўскія і Мількамановічы, украінцы Гуменюкі, немцы Фалендорфы... Усім ставала тут месца, усе былі сябрамі і добрымі суседзямі, дзеці якіх гулялі разам.
Можаце нават сабе ўявіць такі дыялог, які адбыўся б паміж жыхаром Новага Свету і нейкім прыезжым, які трапіў на гэтыя вулкі гадоў так семдзеся таму:
- А хто тут, уласна, жыве, у гэтым Новым Свеце?
- Як хто, розныя людзі. У гэтым асабнячку, пабудаваным у суперсучасным заходнееўрапейскім стылі канструктывізма, жыве рускі белаэмігрант. У тым неабарочным доміку сям’я старой беларускай татарскай шляхты. У тым цагляным, праз вуліцу, бачыце, з прыгажэннымі дзвярыма ў стылі “мадэрн”, сярэдняй рукі габрэйскі прадпрымальнік мае пякарню. А вось у гэтым, драўляным з цягляным брандмаўэрам, з цудоўнымі разнымі ліштвамі і ганкам (калі не пад Тулу ці Разань, то прынамсі пад Падмаскоўе) жыве вядомы інжынер, чыстакроўны паляк, які прыехаў у наш горад аднекуль з-пад Кракава.
- А беларусы.
- А беларусаў і палякаў, з мясцовых, тут не злічыць.
З багатай гісторыяй і выключнай архітэктурай гарадзенскага Новага Свету вы можаце ў гэтым раздзеле “Віртуальнай Гародні”.
Чытайце таксама: 26.06.2008 Праграма фотапленэру “Адкрый Новы Свет” 25.06.2008 Жыхароў Новага Свету запрасілі на фотапленэр 11.06.2008 Адкрый Новы Свет – фотаакцыя ў абарону Гродна 09.06.2008 Што ў нармальнай краіне можна зрабіць з Новым Светам, або як ахоўваюць драўляную гістарычную забудову ў Еўропе 24.05.2008 Падведзены вынікі конкурса, прысвечанага Новаму Свету 29.04.2008 Гродзенскі Новы свет (Даследаванне Таццяны Казак) 03.04.2008 «Новый Свет» - белорусский Скансен 06.04.2008 Фотавандроўка па Новым Свеце 03.04.2008 Разбурэнні будынкаў на Новым Свеце 28.02.2008 Ураду Масквы аддадуць стары квартал Горадні? 19.04.2007 Навукова-метадычная здрада
|
